Uhlabene Ngemiklomelo Emibili Ehlonishwayo

BY: .

Click here for English version

I-Academic Leader: Research in the School of Nursing and Public Health, uDkt Tivani Mashamba-Thompson, uhlabene ngama-fellowship omhlaba amabili.

Eyokuqala kwi-CTN Fellowship yengqalasizinda yocwaningo ngengculazi kuhulumeni; kwathi eyesibili wayigixabezwa yi-Centre for the Advancement of Sustainable Medical Innovation (i-UCL-CASMI) yase-University College London.

I-CTN International Fellowship yowama-2019/20 ihlose ukuqeqesha ososayensi bomhlaba abazinikele ekuthuthukiseni izindlela zokwelapha ingculazi nesandulela sayo noma ukuyinqanda ezweni elinganothile ngezinto zokwelapha.

Umsebenzi kaMashamba-Thompson ukucwaninga amathuba empumelelo ekuzihloleni emphakathini kwamadoda asezindaweni ezisemadolobheni eNingizimu Afrika. Ubambisene noSolwazi Paul Drain, aseneminyaka emihlanu esebenza naye.

Umuntu ongumeluleki wakhe kuleli uDkt Dr Richard Lessells, ingwazi kwezezifo ezithelelanayo, phecelezi i-Senior Infectious Disease Specialist, eMnyangweni Wezifo Ezithathelanayo e-Nelson R Mandela School of Medicine e-UKZN.

Ongumeluleki wakhe ose-Canada uSolwazi Lehane Thabane, onoxhaxha lwezikhundla ezinkulu emazweni ehlukene.

I-UCL-CASMI, ephethwe wuSolwazi Sir John Tooke, inhloso yayo wukukhiqiza uxhaxha lwezifundiswa nosolwazi abazinikele ekuqondeni nasekuthuthukiseni izindlela ezisebenzayo nezongayo zokusabalalisa izindlela nezinto ezintsha zokwelapha. I-fellowship ye-CASMI ikhuthaza ukuxhumanisa ucwaningo oluhlukene nezikhungo zemfundo ephakeme ezehlukeni ukucwaninga nokwabelana ngolwazi, ihlele imihlangano efanele nokuba nomthelela ekushayweni nasekusebenzeni kwemithetho.

Ngale fellowship, uMashamba-Thompson unikwe ithuba lokucija ezingeni eliphezulu elikhokhelwa yi-UCL, okubalwa kulo ukuphokophela, ukujula ekucabangeni nobuholi. Uzokwazi ukubamba iqhaza ochungechungeni lwakwa-Lancet namakhomishini.

Kusukela aqala e-UKZN eyi-Developmental Lecturer ngo-2015, uMashamba-Thompson unevuso lokucwaninga. Wayengomunye wabacwaningi abayishumi abaseqhulwini okwashicilelwa amaphepha abo ocwaningo ngowama-2018, unamaphepha ocwaningo avunywa ngabalingani bakhe evile kuma-50 kanti useke wacija izitshudeni eziyishumi nesisodwa seziqu zobudokotela emkhakheni waso zaze zagogoda.

UMashamba-Thompson udume ngokuzinikela ekudlondlobaliseni ikhono locwaningo ngezithangami zokuhlela nokubuyekeza ezocwaningo.

‘Ngiyathokoza ukubona ucwaningo lwami luhlonishwa ezingeni lomhlaba kanti ngiyabonga ngokugixabezwa ngalama fellowship amakhulu emsebenzini wami. Ngiyabonga kakhulu ukucathuliswa ngabantu abanjengo Dkt Richard Lessells noSolwazi Lehane Thabane noSolwazi Paul Drain engibambisene naye kulo msebenzi we-CTN,’ kusho uMashamba-Thompson.

‘Njenge-Academic Leader: Research, kufanele ngikhombe indlela. Ngikholwa wukuthi ukuqeqeshwa kumakhono obuholi okuhambisana ne-fellowship ye-CASMI kuzothuthukisa amakhono ami obuholi. Sengiluqalile uhlelo lokucijelwa nokucijela ubuholi kanti ngikubheke ngamehlo abomvu ukusebenzisana noSolwazi Sir John Tooke nethimba lakhe,’ kuphetha yena.

Amagama: nguNombuso Dlamini

Isithombe: Sithunyelwe